التحية للمراة السودانية

*( محاسن )*

*شعر / صديق الرضي*
*الصداقة*
عليك المولى ما بتخجل
بتتهكم عليها تقول
محاسن كبي لي حرجل
اكبك الله داخل بير
واقع في البير
كمان كم فيل
وتتكسر
وتتبرجل
محاسن امي
وأختي كمان
وخالة وعمه
بت جيران
نعم ست شاي
نعم بتحنن النسوان
نعم بتبيع تسالي وفول
لكن هي من الرجال أنبل
محاسن هي ست البيت
وست الناس
وسامية وغالية زي الماس
محاسن ساس
محاسن هامة ما بتنداس
ممكن ما بتفك الخط
وما كتبت على الكراس
محاسن ايوه ياخي مره
بتزعل لو نفد صبرا
وتكسر للرجال الراس
وبرضو بتفضل الاجمل
محاسن شالتك تسعة
محاسن رضعت حولين
محاسن ذايبة زي شمعة
محال توفيها ياخي الدين
محاسن اخفت الدمعة
وصابرة عليك سنين و سنين
محاسن طيبة السمعة
وخاتا الخمسة في الاتنين
محاسن ربتك يا خوي
محاسن خلتك ترجل
معلمة قرت اولادك
طبيبة تداوي شفعنا
محامي
مهندسه وقاضي
اذا أخطانا تردعنا
وحبوبة تحجينا
تطبطبنا
فرحنا ولا دمعنا
وبالأمثال تعلمنا
ومن عاداتا كم ننهل
محاسن واردة في الدونكي
وراعيه لي غنيماتا
محاسن ماسكة للسونكي
بتحفظ طين وليداتا
محاسن في الفجر بتشيل
ملودا وطوريتا ومنجل
بسيطة تلقط الويقود
حكيمة تطبب الميرود
حفيدة ل (نعيم) الجود
كريمة تجود هي بالموجود
ولو مافيش
برضو تقولك إتفضل
محاسن حرة بت حرة
تبيع الدكوة والكسرة
عشان اتعلموا الاولاد
وشان تتزوج السرة
نقية وفية ناصعة صفاتا
وكاسيها العفاف والسترة
شامخة
أبية حاشاها
لا مزلولة لا منكسرة
مميزة بين نديداتا
وفي أفكارا دايما حل
محاسن ياها كنداكة
في محنك تملي معاك
وفي كل خطوة سانداكا
سخية و ما بخيلة عليك
ولو حيلتها مسواكا
ومرات ما بربي أبو
لبن ضرعاتا رباكا
ولما اجيبو سيرتا بس
خلاص الكلام بكمل
وبرضو تقول…
محاسن كبي لي حرجل!!!
قول لي بس بتسخر ليه
وفرقك من محاسن إيه
فاقد بس إجيك الحيض
وناقص بس كمان تحبل.
محاسن يا حقيبة الفن
محاسن يا العسل والدن
وأقيس محاسنك بمن
ويا الدر الماليك تمن
ولا نور عيني ونور الزمن
ويا البدر الدوبو اكتمل
وفيك صور المحاسن
والمحاسن اغرتك
ريقا يشفي المعلول واهن
بي سمح طبعها سرتك
عيونك الواسع مقاسن
الحشا المبروم والديس والكفل
وإن عشقنا بنعشق محاسن
شان تفوز بيها اتحرتك
ومن محاسن حسن المحاسن
كون ابوها البرتك
والمكارم غرقن ساسن
كون اخوها السرتك
وابقى  فارس لي محاسن
وابقى ليها كمان البطل..